আইও বইনারী আমরা বাড়ি,
দিলাম তোমরারে দাওয়াত।
হান্দেশ পিঠা তইছি বানাইয়া,
আইও তোমরা খাওয়াত।
তোমার ফুয়া ফুড়ি লগে আনিও,
আর আনিও তোমার জামাই।
নয়া শাড়ি ফিন্দিয়া আইয়া,
বইনারী করিওনা তোমরা বড়াই।
ইবার আমি পারছি নাগো,
লইতাম ঈদর শাড়ি।
সর্বনাশা করোনা আইয়া
করের কেমনে বাড়াবাড়ি।
কত মাইনষর রোজগার বন্ধ,
অভাব অনটনে আছওইন।
তারার কথা মনও অইলে,
কইলজার মাঝে করে ঠনঠন।
তুরা টেকা জমাইছলাম,
দিমু ছাগল একটা কুরবানী।
গরীব-ধনী হকলে মিলি,
খাইমু আমরা ঈদর খানি।
হাতকরা দি ছিনার হাড্ডি,
রানমু বইনারী মজা করি।
কিজাত মজার ঘ্রান বারঅইবো,
খাইবায় তোমরা পেট ভরি।
পুকুর হিছাইয়া মাছ মারাইমু,
করমু চাইরটা বিরান।
বিরইন ভাত’দি খাইলে তোমরা,
গাইবায় আমার গুণ গান।
আইও বইনারী বেইল থাকতে,
যাইবায়’নে দুইদিন রইয়া।
তোমরারে দেখবার লাগি,
বইরইছি পথর বায়’দি চাইয়া।
