জিলহজ্বেরই দশ তারিখে,
অইবো কুরবানীর ঈদ।
জোয়ান বুড়া হকলর খুশি,
আহা নাইরে চউখো নিদ।
পয়লা ৯দিন কাটাই দিমু,
রোজা,নমাজ,নেক কাজ করিয়া।
১০ তারিখে ঈদ করমু,
আত্মীয় বন্ধু হক্কলে মিলিয়া।
মাই চাচীয়ে হেরান অইয়া,
হান্দেশ পিঠা বানাইবা।
ঈদর দিন কুটুম আইলে,
তারারে খাইতে দিবা।
দলবান্ধিয়া হক্কল বেটাইন,
যাইবা ঈদর নমাজও।
করোনা আইয়া লাগাইছে বেরা,
পড়বা নমাজ গাঁওর মছিদও।
নমাজ শেষে তফিক আনমান,
দিবা কেউ কেউ কুরবানী।
ন্যস্ত গোস্ত বাটিয়া দিমু,
গরীবেও খাইবো ঈদর খানি।
বনের পশু জবাইর সাথে দিও,
তোমার মনের পশু কুরবান।
দিলের খবর কেউ জানেনা,
জানেন আল্লাহ রহমান।
কুরবানি অইলো ত্যাগের শিক্ষা,
নায় কোন সামাজিক রীতি।
আল্লারে খুশি রাখতে করি কাম,
অন্তরেও রাখি আল্লার ভীতি।
